रियल इस्टेट परियोजनाका नाममा करिब ८९ मिलियन डलर उठाएर याट र विलासी घर किने, विकासकर्तालाई ११ वर्ष ४ महिना जेल
मियामीका पूर्व चर्चित रियल इस्टेट विकासकर्ता ऋषि कपूरलाई लगानीकर्ताको करोडौँ डलर दुरुपयोग गरेको अभियोगमा ११ वर्ष ४ महिना (१३६ महिना) संघीय जेल सजाय सुनाइएको छ।
४२ वर्षीय कपूरले Location Ventures नामक कम्पनीमार्फत दक्षिण फ्लोरिडामा आवासीय तथा मिश्रित प्रकृतिका परियोजनाका लागि लगानी जुटाउँदै आएका थिए। अदालतमा पेश गरेको तथ्यगत बयानमा उनले झूटा तथा भ्रामक विवरण दिएर लगानीकर्ताबाट करिब ८९.४ मिलियन डलर उठाएको स्वीकार गरेका छन्।
अमेरिकी जिल्ला न्यायाधीश के. माइकल मूरले अगस्ट २७ मा कपूरलाई १३६ महिना संघीय जेल र त्यसपछि तीन वर्ष निगरानीमा रहने सजाय सुनाएका हुन्।
लगानीकर्ताको पैसा याट र ५.९ मिलियन डलरको घरमा
अदालतका कागजातअनुसार कपूरले लगानीकर्ताको रकम विभिन्न परियोजनाबीच अनुमति बिना सार्ने गरेका थिए। केही रकम व्यक्तिगत प्रयोजनमा समेत प्रयोग भएको थियो।
सन् २०२१ मा Location Ventures सम्बन्धित खाताबाट करिब १.५ मिलियन डलर उनको व्यक्तिगत खातामा पठाइएको थियो। सन् २०२२ मा थप करिब १.३२८ मिलियन डलर उनलाई शुल्क तथा नाफाका नाममा दिइएको थियो।
सन् २०१८ देखि २०२३ सम्म कपूरले कम्पनी तथा सम्बन्धित परियोजनाबाट ६ मिलियन डलरभन्दा बढी प्राप्त गरेको अदालतमा स्वीकार गरेका छन्।
त्यसमध्ये ८२०,५५९ डलर ठगीबाट आएको रकम प्रयोग गरी ६८ फिट लामो Princess मोटर याट खरिदमा रकम लगानी गरिएको थियो। उक्त याटको मूल्य ५ मिलियन डलरभन्दा बढी थियो।
त्यसैगरी, फ्लोरिडाको महँगो क्षेत्र Cocoplum मा करिब ५.९ मिलियन डलरको waterfront घर खरिद गर्दा पनि लगानीकर्ताको दुरुपयोग गरिएको रकम प्रयोग भएको अभियोजन पक्षले जनाएको छ।
कन्डो खरिदकर्ताको १०.६ मिलियन डलरभन्दा बढी रकम दुरुपयोग
Location Ventures ले Villa Valencia, URBIN Miami Beach र URBIN Coconut Grove लगायतका परियोजनामा निर्माण सम्पन्न हुनुअघि नै कन्डो बिक्री गरेको थियो।
कपूरले अदालतमा स्वीकार गरेअनुसार, खरिदकर्ताले जम्मा गरेको रकममध्ये करिब १०.६ मिलियन डलर अनुमति नभएका प्रयोजनमा प्रयोग गरिएको थियो।
कन्डोका खरिदकर्ताबाट प्राप्त रकम निर्माण तथा विकाससम्बन्धी स्वीकृत खर्चमा प्रयोग गर्ने भनिए पनि त्यसको केही हिस्सा अन्य प्रयोजनमा सारिएको थियो।
एक लगानीकर्तालाई तिर्नुपर्ने २६.३ मिलियन डलर पनि अन्यको रकमबाट
सन् २०२२ मा एक प्रमुख लगानीकर्ताले कपूरको व्यवस्थापनमाथि प्रश्न उठाउँदै कम्पनीभित्रको अनियमितता पत्ता लगाएपछि आफ्नो लगानी फिर्ता लिन खोजेका थिए।
कपूरले उक्त लगानीकर्ताको हिस्सेदारी खरिद गर्ने सहमति गरे। तर त्यसका लागि आफ्नै स्रोत प्रयोग गर्नुको सट्टा अन्य लगानीकर्ताको रकम तथा अन्य परियोजनाका निर्माण ऋणबाट करिब २६.३ मिलियन डलर तिरेको अदालतमा स्वीकार गरेका छन्।
कर्मचारीको तलबबाट काटिएको कर पनि IRS मा नबुझाएको आरोप
कपूरको अपराध रियल इस्टेट लगानीकर्तामै सीमित थिएन। कम्पनीका कर्मचारीको तलबबाट काटिएको Social Security र Medicare payroll tax समेत समयमा IRS मा नबुझाएको आरोपमा उनले दोष स्वीकार गरेका छन्।
यो विषय सन् २०२० देखि २०२२ सम्मको करसँग सम्बन्धित थियो।
अदालतका कागजातअनुसार, कपूरको जानकारी तथा निर्देशनमा केही QuickBooks रेकर्डसमेत झूटा रूपमा तयार गरिएको थियो, जसले कर तिरिसकेको जस्तो देखाउने प्रयास गरिएको थियो।
सन् २०२३ मा नयाँ व्यवस्थापन आएपछि कम्पनीले करिब १.३८ मिलियन डलरको बक्यौता कर तिरेको थियो। तर जरिवाना, ब्याजलगायत कम्तीमा थप ८ लाख डलर बाँकी रहेको बताइएको छ।
३७ वटा संघीय अभियोगपछि दोष स्वीकार
कपूरलाई संघीय ग्रान्ड जुरीले ३७ वटा अभियोग लगाएपछि मार्चमा पक्राउ गरिएको थियो। ती अभियोगमा wire fraud, money laundering, tax crimes र bank fraud लगायतका मुद्दा थिए।
पछि मेमा भएको plea agreement अन्तर्गत उनले money laundering र अमेरिकी सरकारलाई ठगी गर्ने षड्यन्त्रसम्बन्धी एक–एक अभियोगमा दोष स्वीकार गरे। बाँकी अभियोग सम्झौताअनुसार खारेज गर्ने सहमति भएको थियो।
उनले कम्तीमा ७०,३३६,८८९.२० डलर लगानीकर्तासँग सम्बन्धित क्षतिपूर्ति तथा IRS लाई कम्तीमा ८ लाख डलर तिर्नुपर्ने उल्लेख छ। अन्तिम क्षतिपूर्ति रकम भने छुट्टै निर्धारण गरिँदै थियो।
अदालतले अभियोजन पक्षले माग गरेकै १३६ महिना जेल सजाय सुनाएको हो।
अभियोजन पक्षका अनुसार ५० भन्दा बढी लगानीकर्ता अझै रकम पाउन बाँकी छन्। Location Ventures का सम्पत्ति बिक्री गरेर लगानीकर्ता, ऋणदाता र अन्य ऋणदाताबीचको दाबी व्यवस्थापन गर्ने छुट्टै SEC receivership प्रक्रिया पनि चलिरहेको छ। त्यसैले पीडितहरूले अन्ततः अदालतले तोकेको सम्पूर्ण रकम फिर्ता पाउने सम्भावना नहुन सक्छ।
सम्बन्धित खवर
-
अमेरिकी नागरिकको सुरक्षाभन्दा ...
-
टेक्सस, अमेरिका, १३ भदौ ...
