US Nepal Post

अमेरिका– अमेरिकाको फलोरिडाकी एक महिलाले प्रहरीको ९११ फोन प्रणालीको दुरुपयोग गरेर १२ हजार भन्दा अधिक पटक प्रहरी अधिकारीलाई फोन गरेको खुलेको छ ।
यसरी उनले गरेको यो फोन धम्कीले भरिएको प्रहरीले बताएको छ । ९११ फोन प्रणाली दुरुपयोग गरेर धम्की दिएको आरोपमा यी महिला पक्राउ परेकी छिन् ।
५० वर्षिया कार्ला जेफरसन नामकी यी महिलाले बारम्बार फोन गरेर प्रहरीलाई गाली गर्थिन । अघिल्लो महिना उनले २४ घन्टामा ५१२ पटक प्रहरीलाई अश्लिल गालीले भरिएको फोन गरेकी थिइन ।
प्रहरीले गएको जुन महिनामा उनलाई यस प्रकारको फोन नगर्न चेतावनी दिएको थियो । तर पनि उनले बारम्बार फोन गर्न नछाडेपछि प्रहरीले पक्राउ गरेको थियो । पछि उनलाई रिहा गरिएको थियो । यी महिला पहिला पनि गुन्डागर्दिको आरोपमा जेल सजाय भागेकी थिइन ।