अमेरिकाकेा ग्रिन कार्ड प्रायोजनमा ठूलो परिवर्तन, USCIS ले स्पोन्सरको क्रेडिट रिपोर्ट माग्न सक्ने
अमेरिका — अमेरिकामा परिवारका सदस्यलाई ग्रिन कार्डका लागि आर्थिक रूपमा स्पोन्सर गर्ने व्यक्तिका लागि नयाँ व्यवस्था लागू भएको छ। अमेरिकी नागरिकता तथा अध्यागमन सेवा (USCIS) ले Form I-864 (Affidavit of Support) मा परिवर्तन गर्दै स्पोन्सरको क्रेडिटसम्बन्धी जानकारी उपभोक्ता रिपोर्टिङ एजेन्सीबाट माग्न सक्ने व्यवस्था गरेको हो।
USCIS का अनुसार Form I-864 को नयाँ संस्करणमा स्पोन्सरले सरकारलाई एक वा बढी consumer reporting agencies बाट आफ्नो सम्बन्धित जानकारी माग्न अनुमति दिने privacy release समावेश गरिएको छ। यो परिवर्तन अगस्टमा घोषणा गरिएसँगै तत्काल लागू भएको हो।
यद्यपि, USCIS ले प्राप्त हुने क्रेडिटसम्बन्धी जानकारीलाई ठ्याक्कै कसरी प्रयोग गर्ने भन्नेबारे विस्तृत जानकारी भने सार्वजनिक गरेको छैन।
न्यूनतम क्रेडिट स्कोर तोकिएको छैन
नयाँ व्यवस्थासँगै स्पोन्सरले अब निश्चित क्रेडिट स्कोर कायम गर्नुपर्ने हो कि भन्ने चासो बढेको छ। तर USCIS ले हालसम्म कुनै न्यूनतम क्रेडिट स्कोर तोकेको छैन।
त्यस्तै, क्रेडिट रिपोर्टबाट कुन–कुन विवरण हेरिनेछ वा स्पोन्सरले आफ्नो क्रेडिट स्कोर फारममै उल्लेख गर्नुपर्नेछ कि छैन भन्ने पनि स्पष्ट गरिएको छैन।
अध्यागमनसम्बन्धी विज्ञहरूका अनुसार यसलाई तत्कालै ‘क्रेडिट स्कोरका आधारमा ग्रिन कार्ड अस्वीकार गर्ने नयाँ नियम’ का रूपमा बुझ्नु उचित नहुन सक्छ। USCIS ले थप निर्देशन जारी गरेपछि यसको वास्तविक प्रभाव अझ स्पष्ट हुने अपेक्षा गरिएको छ।
स्पोन्सरले कति आम्दानी देखाउनुपर्छ?
हालको नियमअनुसार परिवारका सदस्यलाई ग्रिन कार्डका लागि स्पोन्सर गर्ने व्यक्ति, संयुक्त स्पोन्सर वा substitute sponsor ले सामान्यतया आफ्नो परिवारको आकारअनुसार अमेरिकी संघीय गरिबी मापदण्डको कम्तीमा १२५ प्रतिशत बराबरको आम्दानी रहेको प्रमाणित गर्नुपर्छ।
परिवारको आकार गणना गर्दा स्पोन्सर स्वयं, आश्रित सदस्य, घरमा बस्ने केही आफन्त तथा स्पोन्सर गरिँदै गरेको आप्रवासीलाई समेत समावेश गरिन्छ।
तर सक्रिय अमेरिकी सैन्य सेवामा रहेका व्यक्तिले आफ्नो पति/पत्नी वा सन्तानलाई स्पोन्सर गर्दा आम्दानीको सीमा सामान्यतया १०० प्रतिशत संघीय गरिबी मापदण्ड हुन्छ।
स्पोन्सरहरूले आफ्नो आर्थिक क्षमता प्रमाणित गर्न संघीय आयकर रिटर्नलगायतका कागजात पेश गर्न सक्छन्। आवश्यकताअनुसार जन्म प्रमाणपत्र, पासपोर्ट वा ग्रिन कार्डजस्ता थप कागजात पनि पेश गर्नुपर्ने हुन सक्छ।
क्रेडिट फ्रिज गरेकाहरूलाई USCIS को चेतावनी
USCIS ले आफ्नो क्रेडिट वा consumer report मा credit freeze वा security freeze राखेका स्पोन्सरहरूलाई विशेष सावधानी अपनाउन भनेको छ।
यस्तो freeze का कारण USCIS ले Form I-864 को आर्थिक पर्याप्तता मूल्यांकन गर्न आवश्यक जानकारी प्राप्त गर्न नसक्ने सम्भावना रहेको एजेन्सीले जनाएको छ।
USCIS ले क्रेडिट वा security freeze हटाउन अनुरोध आएमा त्यसको छिटो प्रतिक्रिया दिन स्पोन्सरहरूलाई आग्रह गरेको छ।
विज्ञहरू के भन्छन्?
अध्यागमन कानुन विज्ञहरूका अनुसार नयाँ व्यवस्थाले स्पोन्सरको आर्थिक अवस्थाको मूल्यांकन गर्ने USCIS को दायरा केही फराकिलो बनाउन सक्छ। तर अहिले नै खराब क्रेडिट स्कोरका कारण स्पोन्सर अयोग्य हुने निष्कर्ष निकाल्न पर्याप्त आधार छैन।
विशेषज्ञहरूले क्रेडिट कार्डको भुक्तानीमा भएको ढिलाइ, पहिचान चोरी (identity theft) वा क्रेडिट रिपोर्टमा भएको त्रुटिजस्ता विषयले परिवारलाई अनिश्चित रूपमा प्रभावित गर्न नहुने बताएका छन्।
केही अध्यागमन विज्ञहरूले USCIS ले स्पोन्सरको क्रेडिटसम्बन्धी तथ्यांकलाई भविष्यमा आप्रवासी सरकारी सुविधा वा सार्वजनिक लाभमा निर्भर हुने सम्भावनासँग तुलना गर्न प्रयोग गर्न सक्ने अनुमान गरेका छन्। यद्यपि, USCIS ले यस्तो उद्देश्य आधिकारिक रूपमा पुष्टि गरेको छैन।
त्यसैले अहिलेका लागि मुख्य परिवर्तन भनेको Form I-864 मा USCIS लाई consumer reporting agencies बाट स्पोन्सरसम्बन्धी जानकारी माग्न अनुमति दिने व्यवस्था थपिनु हो। यसको वास्तविक प्रयोग र प्रभावबारे USCIS ले थप निर्देशन जारी गर्न बाँकी छ
सम्बन्धित खवर
-
सेप्टेम्बर ३, २०२६ग्रीनभिल ...
-
अमेरिका/क्यानडा — अमेरिकाको ...
