US Nepal Post

जाेर्जिया- बिगत ५ बर्ष देखि निरन्तररूपमा ‘एटलान्टा इभेन्ट एण्ड प्लानर’द्वारा आयोजना गरिंदै आएको यो उत्सव यस बर्ष पनि “मनोरम प्रणय दिवस २०२०” Atlanta Georgia स्थित आषीयना रेस्टुराँमा भव्य रुपमा सम्पन्न गरियो । उक्त कार्यक्रममा मुख्य आकर्षणको रुपमा बलिउडका  प्रख्यात नायिका रेखा राणाको उपस्थिति रहेको थियो | प्रमुख अतिथिसंगको साक्षात्कार सहित नेपाली संस्कृतिक कार्यक्रमले कार्यक्रममा रौनकता थपेको थियो | 

यस बिशेष अवसरमा नेपालको तर्फबाट पर्यटनदुत राजा घलेले नेपाल भ्रमण बर्ष-२०२० का बारे प्रकाश पार्दै उपस्थित सबैलाई यो बर्ष नेपाल घुम्न जानका लागि आग्रह समेत गर्नुभयो | आफ्नो मन्तव्यमा श्री घलेले नेपालको प्राकृतिक सौन्दर्यता, सांस्कृतिक बिबिधता, रहनसहन आदिको महत्व दर्शाउँदै “Visit Nepal-2020” लेखिएको तुल प्रदर्शन गर्नुभयो | तुल प्रदर्शन गर्न भैरब गुरुङ र संजय शाहले बिशेष सहयोग गर्नुभएको थियो | उक्त तुलमा विश्वको सबैभन्दा अग्लो हिमाल Mount Everest र भगवान गौतम बुद्धको जन्मस्थल लुम्बिनी अंकित रहेको थियो |

यस अवसरमा प्रमुख अतिथि लगायत कार्यक्रममा उपस्थित सम्पूर्ण अतिथिहरुले आ-आफ्नो स्थानबाट उभिएर तालीले स्वागत गरेका थिए | प्रमुख अतिथि रेखा राणाले आफ्नो छोटो मन्तव्यका क्रममा नेपालको प्रशंसा गर्नुका साथै व्यक्तिगत रुपमा आफैले पनि Visit Nepal का बारे प्रचार-प्रसार गर्ने प्रतिबद्धता समेत जाहेर गर्नुभयो |